Ինչո՞վ են օգտակար լոբին եւ ոլոռը. news.am

Լոբազգիներն ու ոլոռն արագ են հագեցնում եւ ավելի երկար են պահպանում այդ զգացողությունը, քան մսամթերքը, այդ պատճառով այս մթերքների կանոնավոր օգտագործումը կարող է օգնել ազատվել ավելորդ քաշից: Նման եզրահանգման են եկել University of Copenhagen-ի գիտնականները:

Հետազոտության շրջանակում տղամարդկանց խումբը սնվել է կա՛մ բուսական սննդակարգով՝ մեծ քանակությամբ լոբազգիների եւ ոլոռի պարունակությամբ, կա՛մ մսամթերք ներառող սննդակարգով: Պարզվել է, որ լոբազգիներով սնված տղամարդիկ հաջորդ անգամ սնվելիս 12%-ով ավելի քիչ կալորիա պարունակող սնունդ են օգտագործել: Սա անակնկալ էր նաեւ հետազոտողների համար, քանի որ լայնորեն տարածված է կարծիքը, թե սպիտակուցները մանրաթելերից ավելի լավ են հագեցնում, ինչի պատճառով առավել տարածված են սպիտակուցային սննդակարգերը:

Հետազոտության հեղինակների խոսքով՝ մարդը կարող է մեծ քանակությամբ մանրաթելեր պարունակող սնունդ օգտագործել եւ ավելի արագ հագենալ ու երկար պահպանել այդ զգացողությունը: Սա քաղցի զգացողությունը ճնշելու հարցում մսամթերքի եւ լոբազգիների արդյունավետության ուսումնասիրությանն ուղղված առաջին հետազոտությունն է: Այն ցույց է տվել, որ լոբազգիները կարող են, իսկապես, օգնել նիհարել:

Հետազոտության հեղինակները նաեւ ընդգծել են, որ բանջարեղենային սննդակարգը զգալիորեն քիչ է ծանրաբեռնում օրգանիզմը բարեխառն կլիմայական գոտու պայմաններում, քան` մսամթերքը:

Հարցեր, պատասխաններ, մեկնաբանություններ